سیحون کوهسار

روزنامه هشت‌صبح گزارش داده‌است که اجساد سه مهاجم مسلح که در مرز تاجیکستان به مرزبانان این کشور حمله کرده و کشته شدند، در اختیار این رسانه قرار گرفته‌است.

بر اساس گزارش، این مهاجمان، اعضای گروه «انصارالله» تاجیکستان بوده و گفته می‌شود تحت حمایت گروه طالبان فعالیت می‌کردند.

این منابع افزودند که این جنگ‌جویان توسط «حاجی بشرنورزی» ـ معروف به «پدرخوانده مواد مخدر خراسان‌افغانستان» و یکی از چهره‌های مرتبط با رهبری گروه طالبان ـ رهبری می‌شوند.

از سوی دیگر، کمیته امنیت ملی تاجیکستان در تازه‌ترین بیانیه خود، کشته شدن دو مرزبان این کشور در درگیری‌های مرزی و منشا حمله از خاک خراسان‌افغانستان را تایید کرد.

این کمیته از رهبری گروه طالبان خواسته است از مردم تاجیکستان عذرخواهی کرده و اقدامات موثری برای جلوگیری از حملات تروریستی آینده انجام دهد.

مقامات امنیتی تاجیکستان تاکنون در مورد هویت مهاجمان اظهارنظری نکرده‌اند.