محمد نوید دانشپور

تاجیکستان، ایران و گروه ط‌ـ‌البان برای ایجاد یک دهلیز ترابری مشترک با هدف توسعه انتقالات جاده‌ای و گسترش همکاری‌های اقتصادی به توافق رسیده‌اند.

خبرگزاری ملی تاجیکستان «خاور» روز جمعه، ۹ اسد/مرداد، این خبر را به نقل از وزارت ترابری این کشور منتشر کرده است.

وزارت ترابری تاجیکستان اعلام کرده است که این توافق در دیدارهای عظیم ابراهیم، وزیر ترابری تاجیکستان، با مقام‌های وزارت‌های ترابری ایران و گروه ط‌ـ‌البان حاصل شده و در راستای تقویت همکاری‌های حمل‌ونقل و منافع اقتصادی سه کشور است.

به گفته این وزارت، برای پیگیری روند اجرای توافق، هیاتی به ریاست شویسته سعیدمرادزاده، معاون وزیر ترابری تاجیکستان، به ایران سفر کرد و گفت‌وگوهای رسمی نمایندگان سه کشور در روزهای ۱۴ و ۱۵ جولای در شهر مشهد برگزار شد.

این ابتکار با هدف آسان‌سازی گذرگاهی جاده‌ای، توسعه مسیرهای حمل و نقل منطقه‌ای و افزایش همکاری‌های اقتصادی میان خراسان‌افغانستان، ایران و تاجیکستان دنبال می‌شود و می‌تواند زمینه‌ساز گسترش مبادلات بازرگانی میان سه کشور باشد.