مراسم رسمی اعزام جوانان به خدمت نظامی روز چهارشنبه (۹ میزان/مهر) در شهر دوشنبه، پایتخت تاجیکستان برگزار شد.
در این مراسم، متولدین سال‌های ۱۳۷۷ تا ۱۳۸۶ که مشمول خدمت اجباری بودند، برای اعزام به صفوف نیروهای مسلح این کشور ثبت‌نام و آماده‌سازی شدند.
خانواده‌های سربازان، مقامات محلی و نمایندگان وزارت دفاع تاجیکستان در این رویداد حضور داشتند.
طبق قانون این کشور، خدمت نظامی برای مردان ۱۸ تا ۲۷ ساله با تحصیلات متوسطه یا فنی ۲۴ ماه تعیین شده است. برای فارغ‌التحصیلان نهادهای آموزش عالی و مراکز نظامی، این مدت ۱۲ ماه است و پس از پایان خدمت، درجه نخست افسران به آنان اعطا می‌شود.
بر اساس اعلام مقام‌های تاجیکستان، در سال‌های اخیر شمار جوانانی که داوطلبانه برای خدمت سربازی ثبت‌نام می‌کنند افزایش یافته است. بسیاری از مشمولان، پس از دریافت نخستین فراخوان، در کمیسیون‌های اعزام حاضر می‌شوند.
