به گزارش رسانه‌های تاجیکستان، دولت این کشور تصمیم گرفته است که صدها جلد کتاب شاهنامه فردوسی را برای مردم تاجیکستان به گونه‌ی رایگان توزیع نماید.
گزارش‌ها می‌رسانند که تاکنون در استان خودمختار کوهستانی بدخشان تاجیکستان و نواحی تاجیک‌آباد، لخش و رشت در شرق این کشور، به هر خانواده دو جلد کتاب «شاهنامه» به خط سیریلیک اهدا شده است.
دستور انتشار و اهدای رایگان «شاهنامه» به مردم تاجیکستان را، امام‌علی رحمان، رئیس‌جمهور تاجیکستان، در همایشی بین‌المللی به افتخار صد و پانزدهمین سالگرد تولد آکادمیسین باباجان غفورف، نویسنده کتاب «تاجیکان» در سال ۱۴۰۲ صادر کرد.
هدف این اقدام، به گفته دولت تاجیکستان، آشنایی بیشتر مردم این کشور با داستان حماسی «شاهنامه»، ارج‌گذاری به تاریخ و ادب و فرهنگ، تربیت نسل جدید با روحیه میهن‌دوستی، ترویج شجاعت و دلاوری و آماده بودن جوانان برای پاسداری از مرز و بوم کشور است؛ موضوعاتی که در شاهنامه، از آغاز تا پایان آن، بازتاب یافته است.
اما برخی کارشناسان می‌گویند، برای دستیابی به این هدف تنها انتشار شاهنامه و توزیع رایگان آن به خانواده‌ها، کافی نیست. به گفته آنان، برای درک و فهم پیام‌های فردوسی در شاهنامه، باید محفل‌های شاهنامه‌خوانی را دوباره در میان مردم احیا گردد.
همچنین برگزاری مسابقه شاهنامه‌خوانی در تاجیکستان و تشویق بهترین نقل‌کنندگان داستان‌های شاهنامه می‌تواند توجه نسل جوان را به کتاب و مطالعه، بیشتر کند.
این کتاب حماسی از سوی انتشارات «شرق آزاد» نهاد وابسته به دفتر ریاست جمهوری تاجیکستان در مجموع به تعداد سه‌میلیون و چهارصد هزار جلد چاپ شده است.
